سنگین گناہ کونسا ہے؟ سوال نمبر ٤۵۵

 سوال 

السلام علیکم ورحمتہ اللہ وبرکاتہ

وہ کونسا سب سے خطرناک گناہ ہے جو فجر سے قبل کی سنت چھوڑنے سے اور قرآن کی تلاوت نہ کرنے سے بڑھ کر ہے, اور جو آسانی سے معاف نہیں ہوتا, اور اللہ نے قرآن میں اس گناہ کا بدترین مثال کے ساتھ ذکر کیا ہے؟

سائل: امجد پتھان

الجواب وباللہ التوفیق

باسمہ سبحانہ وتعالی

قرائن سے وہ گناہ غیبت معلوم ہوتا ہے اس لئے کہ اسلام میں غیبت کرنے کی سخت وعید آئی ہے اور قرآن میں اس کا بدترین مثال کے ساتھ تذکرہ ہے یعنی اپنے مرے ہوئے بھائی کے گوشت کھانے کے برا اس کو قرار دیا ہے۔

قرآن حکیم میں ارشاد ہوتا ہے۔

وَلَا يَغْتَب بَّعْضُكُم بَعْضًا أَيُحِبُّ أَحَدُكُمْ أَن يَأْكُلَ لَحْمَ أَخِيهِ مَيْتًا فَكَرِهْتُمُوهُ وَاتَّقُوا اللَّهَ إِنَّ اللَّهَ تَوَّابٌ رَّحِيمٌ۔ الحجرات، 12O

اور نہ پیٹھ پیچھے ایک دوسرے کی برائی کیا کرو، کیا تم میں سے کوئی شخص پسند کرے گا کہ وہ اپنے مُردہ بھائی کا گوشت کھائے، سو تم اس سے نفرت کرتے ہو۔ اور (اِن تمام معاملات میں) اﷲ سے ڈرو بیشک اﷲ توبہ کو بہت قبول فرمانے والا بہت رحم فرمانے والا ہے

 

اسی طرح حضور نبی اکرم صلی اللہ علیہ وآلہ وسلم کا ارشاد ہے ’’غیبت گناہ میں بدکاری سے بڑھ کر ہے۔‘‘ غیبت ایک ایسا گناہ ہے جس کے مرتکب کو اللہ تعالیٰ باوجود ندامت اور توبہ کے اس وقت تک معاف نہیں کرتا جب تک کہ وہ شخص معاف نہ کردے جس کی غیبت کی گئی ہے۔ یہی وجہ ہے کہ شریعت میں غیبت کو تمام کبائر سے زیادہ مہلک اور سنگین گناہ قرار دیا گیا ہے۔

مشکاة المصابیح میں ہے

وعن أبی سعید وجابر -رضي اللہ عنہما- قالا: قال رسول اللہ صلی اللہ علیہ وسلم: الغیبة أشد من الزنا․ قالوا: یا رسول اللہ وکیف الغیبة أشد من الزنا؟ قال: إن الرجل لیزنی فیتوب فیتوب اللہ علیہ - وفی روایة: فیتوب فیغفر اللہ لہ وإن صاحب الغیبة لا یغفر لہ حتی یغفرہا لہ صاحبہ․ (مشکاة: کتاب الآداب، باب حفظ اللسان)

مرقاة المفاتیح میں ہے 

قال الملا علي القاري: قولہ: ”الغیبة أشد من الزنا“ أی: أصعب منہ لتعلقہا بحق العباد البتة- إلخ (مرقاة المفاتیح: ۷/۳۰۵ ط دار الفکر)

واللہ أعلم بالثواب والیہ المرجع والمآب 

العارض مفتی آصف بن محمد گودھروی