روزے کی حالت میں صرف پانی کا بھاپ لینا کیسا ہے؟ سوال نمبر ٤٦٢

 سوال

السلام علیکم ورحمۃ اللہ وبرکاتہ 

مسئلہ یہ ہے کہ کیا سردی زكام کی صورت میں صرف پانی کی بھاپ لینا یعنی پانی گرم کر کے اس کی پھانپ لینے سے روزہ ٹوٹتا ہے یا نہیں جواب مطلوب ہے۔

سائل عبدالحی سالک

الجواب وباللہ التوفیق

باسمہ سبحانہ وتعالی

روزے کی حالت میں بھاپ لینے سے روزہ فاسد ہوجائے گا چاہے صرف گرم پانی کا ہو یا اس میں دوا کی ملاوٹ ہو چاہے براہ راست لیاجائے یا مشین کے ذریعہ ہر صورت میں اس سے روزہ فاسد ہوجاتا ہے، اس لئے کہ بھاپ لینے کی وجہ سے پانی بخارات میں تبدیل ہوکر ناک کے راستے سے پیٹ کے اندر چلا جاتاہے اس وجہ سے روزہ کی حالت میں بھاپ لینے کی اجازت نہیں ہے اس سے روزہ فاسد ہو جاتا ہے۔ 

فتاوی شامی میں 

قوله أنه لو أدخل حلقه الدخان أي بأي صورة كان الإدخال، حتى لو تبخر ببخور وآواه إلى نفسه واشتمه ذاكراً لصومه أفطر لإمكان التحرز عنه، وهذا مما يغفل عنه كثير من الناس (رد المحتار ٣/٣٧٨ زكريا).

طحطاوي میں ہے 

وفيما ذكرنا إشارة إلى أنه من أدخل بصنعه دخانا حلقه بأي صورة كان الإدخال فسد صومه سواء كان دخان عنبرا أو عودا أو غيرهما حتى من تبخر ببخور فآواه إلى نفسه واشتم دخانه ذاكرا لصومه أفطر لإمكان التحرز عن إدخال المفطر جوفه ودماغه وهذا مما يغفل عنه كثير من الناس فلينبه له (طحطاوی ص ٤٤٠)

واللہ أعلم بالثواب والیہ المرجع والمآب 

العارض مفتی آصف بن محمد گودھروی