روزہ کی حالت میں دانت میں انجکشن لگوانا مفتی آصف گودھروی

 سوال

ایک سوال ہے کہ کیا روزے کی حالت میں دانتوں میں انجکشن لگوا سکتے ہیں بالتفصیل جواب مطلوب ہے؟

سائل: ثالث چھاپی

الجواب وباللہ التوفیق

باسمہ سبحانہ وتعالیٰ

روزہ اس وقت فاسدہوتا ہے جب کوئی چیز منافذ اصلیہ یعنی  پیٹ اور سر کی طرف کسی چیز کے پہنچنے کے راستے سے داخل ہو۔ 

شامی میں ہے۔ ( والمفطر انما هو الداخل من المنفذ . شامی جلد ۔ ۳۶۷ ٫ ۳ )

لہذا روزے کی حالت میں انجکشن لگوانا جائز ہے، خواہ رگ میں لگوایا جائے یا گوشت میں یا دانت میں (لیکن دانت میں لگوانے کی صورت میں اس کا دھیان رہے کہ انجکشن یا خون کے ذرات منہ سے اندر کی طرف نہ جائے ورنہ روزہ ٹوٹ جائے گا)   کیوں کہ انجکشن کے ذریعہ جو دوا بدن میں پہنچائی جاتی ہے وہ اصلی راستوں (منفذ)سے نہیں، بلکہ رگوں یا مسامات کے ذریعہ بدن  میں  جاتی ہے، جب کہ روزہ فاسد ہونے کے لیے ضروری ہے کے بدن کے اصلی راستوں سے کوئی  چیز  جسم کے اندر پہنچے اور انجکشن میں ایسا نہیں ہوتا، لہٰذا روزہ کی حالت میں دانت میں  انجکشن لگانے سے روزہ فاسد نہیں ہوتا، 

فقط والسلام: واللہ اعلم بالصواب

العارض: مفتی آصف گودھروی